НОВО – Дел од појасот и марамата на Пресвета Богородица и во Марковиот манастир!
На појасот на Пресвета Богородица, верниците имаат можност да се поклонат на дел од појасот и марамата на Пресвета Богородица, кои од неодамна, како раритет, се вброија во оваа света обител.
† † †
После своето успение, Пресвета Богородица му го даде својот појас на апостолот Тома.
Тој појас подоцна беше пренесен во Цариград и чуван во запечатен ковчег во црквата на Пресвета Богородица во Влахерна, што ја изгради царицата Пулхерија.
Овој ковчег никогаш не се отвараше, сѐ до времето на царот Лав Мудриот (886 г. – 912 г.).
Сопругата на Лав, царицата Зоа, душевно се разболе, и според некое таинствено видение посака врз неа да го положат појасот на Пресвета Богородица.
Царот го помоли патријархот, па го отворија ковчегот, го извадија појасот и го положија врз болната царица. Таа веднаш оздраве.
Во спомен на тоа чудо се востанови овој празник. Дел од тој појас се наоѓа во Грузија, во Зугдид. Имено, ќерката на царот Роман се исцели со помош на овој појас и подоцна, кога се омажи за царот Абухаз Грузиски, таа понесе дел од појасот со себе.
На заповед од рускиот цар Александар I изградена е посебна црква во Мингрелија во Зугдид, каде што се чува тој дел од чудотворната облека на Пресветата Божја Мајка.
† † †
Пресвета Богородице, моли Го Бога за нас!
