Што е Дивеево?

ДИВЕЕВО – СВЕТА КАНАВКА

Браќа и сестри, вака сведочат оние кои Севишниот Бог ќе ги благослови да ја посетат Неговата светиња.

Што е Дивеево?

Дивеево – тоа е:

– местото кое самата Пресвета Богородица го одредила да биде сочувано до Второто доаѓање на Исус Христос;

– местото каде што се наоѓа Света Канавка, канал кој ногата на антихристот нема да може да го прескокне;

– местото каде што Канавка се наоѓа под самиот Престол Божји и самата Пресвета Богородица секоја ноќ по Небеската Литургија се симнува на неа и поминува по неа;

– местото каде што Канавка во вселената се гледа како огнен столб во облик на круг;

– местото каде што, кога еднаш ќе поминете по Светата Канавка и измолите 150 пати Богородице Дево, самата Пресвета Богородица ве зема под своја заштита;

– местото каде што вашите молитви одат директно пред Престолот Господов, пред нозете на Господа;

– местото каде што и птиците чувствуваат кога литијата ќе тргне по Светата Канавка;

– местото каде што е храмот во кој ќе се служи последната Божествена Литургија на земјата;

– местото каде што е храмот кој во текот на последната Божествена Литургија ќе се вознесе на Небесата и остатокот од Литургијата ќе се отслужи во Царството Небеско;

– местото каде што се гради храм внатре во Канавка по мерките кои ги дала Пресвета Богородица;

– местото каде што се моштите на Преподобниот Серафим Саровски, милиот баќушка, кому Мајката Божја му доаѓала 12 пати и го советувала како да нè подготви за последните времиња;

– местото каде што Светиот Цар Николај Романов го прославил Светиот Серафим Саровски кој пак, го прославил Светиот Цар Николај;

– местото каде што Светиот Цар Николај прв пат чул од јуродивата мајка Паша (Света Параскева) дека ќе добие син, но и дека семејството маченички ќе пострада;

– местото на кое е Казанскиот храм во кој кога ќе бидат внесени моштите на четирите дивеевски светителки близу сме до доаѓањето на Православниот Цар на Русија;

– местото каде што Свети Серафим Саровски ќе воскресне и пак ќе дојде да го проповеда покајанието и да го подготви православниот народ за Второто доаѓање Христово;

– местото каде што Пресвета Богородица отворила извор – Источник кој ги лекува сите кои со вера ќе се погружат три пати во име на Отецот и Синот и Духот Свет;

– местото каде што на Бога му служат 500 монахињи и уште многу послушници;

– местото каде што и брезата сведочи чудо;

– местото каде што брезата која ја посадил Свети Серафим Саровски на која во стеблото како израслина се појавил ликот на мечето Миша, постојаниот сопатник на баќушка;

– местото каде што среќавате многу интересни луѓе, со кои секоја средба е како долго очекувана средба со роден брат;

– местото каде што душите се препознаваат во Христа и се радуваат, неизмерно се радуваат;

– местото на кое кога еднаш ќе појдете, морате да се вратите.

И што можам јас на тоа да додадам?

Да се појде во Света Русија, а да не се појде во Дивеево… тоа е како да бидеш на Света Литургија, а да не се причестиш.

Свети Серафим говорел: „Кој еднаш помине по Светата Канавка, тука му е сè, и Атос и Ерусалим и Киев.“

Да се доживее Дивеево значи да се доживее Русија – Третиот Рим! За православните христијани една од најважните светињи сега и светиња на последните времиња.

Дивеево е мојот ДОМ! Таму не одам, таму се враќам, а секој ден на друго место е увежбување на чекори за Света Канавка!”

Превод : Мирјана Даниловска Мина

http://diveevo52.ru/index3.htm