БОГОЈАВЛЕНИЕ
Во денешното евангелие, на службата од Водокрст, читаме дека свети Јован Го крштева Христос.
Истото го гледаме и на иконата на Богојавление. И сѐ е тоа точно и побожно.
Но, што уште можеме да видиме и сфатиме покрај или позади тоа што го гледаме и читаме?
Прво да си одговориме на ова прашање:
Како Богочовекот Христос со Своето крштевање би ги осветил водите, ако Он не е Истиот и што осветува; а ако Он осветува што ќе Му е крштевање?
Да, Он е Тој што осветува и Нему не Му треба никакво осветување, а сѐ прави за наше спасение – Он е Тој што прв нѐ возљуби.
Затоа, Он се крсти од свети Јован во водите на реката Јордан, а на самиот Јован Крстител и на сите нас ни овозможи да се крстиме со вода и со Светиот Дух, Кој само и единствено заради нас слезе.
Он се крсти во водата, а водата и сѐ создадено, сета твар, се освети и возобнови – повторно стана погоден материјал за совршување на Светите Тајни.
Нему Му се отворија небесата, а на нашето срце му се овозможи да стане влез и седиште на Царството Небесно.
Гласот на Отецот од небесата за Него сведочи: „Тој е Мојот возљубен Син и на Него е Мојата милост“, а на сите нас восиновување ни благовести.
Да, Бог се јави како Света Троица, а вистински Човек ни се покажа – како Црква.
Митрополит Струмички Наум
На Богојавление 2014 г.
