Достојно е навистина Блажена, Тебе да Те нарекуваме, Богородице!
Божествената Литургија ја принесуваме за сите свети, а особено за Пресветата Богородица. Како прво за да им укажеме чест, а второ, да Му се заблагодариме на Бога што ни ги подари да се застапуваат за нашето спасение.
Сите светители, а особено Богородица, е Самата по Себе човечко благодарење на Бога за Неговите добрини. Заради тоа на Неа особено Ѝ укажуваме чест и Ја нарекуваме Блажена.
Владетелката Богородица претставува врвно Создание на Божјата љубов.
Таа претставува исклучително и крајно совршено Божествено исполнување на созданието со Божјата Премудрост.
Пресвета Богородица „е единствена, Таа самата е граница помеѓу создадената и несоздадената природа.
Никој не може да Му се приближи на Бога, освен и единствено преку Неа и Застапникот Кој е роден од Неа.
И ниту еден од Божјите дарови не може да се даде ни на ангелите, ни на луѓето, освен и единствено преку Неа“ (Св. Григориј Палама).
Значи, со право се вознесува заедничка пофална песна од ангелите и луѓето и Таа праведно, и на небото и на земјата, се величи во песни.
Тоа ни го открива и химната Достојно е… упатена кон Богомајката, која се пее токму во овој свет час. Нејзиниот прв дел е плод на видението на архангелот Гаврил од страна на еден светогорски монах.
Архангелот тогаш за првпат ја запеал, заедно со веќе познатиот ирмос Почесна од Херувимите…
Достојно е и праведно Тебе да Ти пееме… изговарале литургот и верниот народ, заедно обраќајќи Му се на Бог Отецот.
Достојно е навистина Блажена, Тебе да Те нарекуваме, Богородице, пеат верните, обраќајќи Ѝ се на Пресветата Богородица.
Бидејќи Таа е „после Бога, единствена Божествена и втора по преемство после Света Троица“ (Богородичен, гл. 1, недела, Вечерна, Изобразителна).
Ангелите и луѓето се соединуваат во единствен заеднички хор за да Ја величаат Вистинската Богородица.
Многубројни имиња Ѝ придаваме на Пресветата Богородица, но првото од нив е Богородица и така Ја именуваме, бидејќи „тоа име во себе ја содржи целокупната Тајна на Божествениот домострој.
Зашто ако Таа, Која родила, е Богородица, тогаш секако, Бог е Оној Кој е роден од Неа; меѓутоа, секако дека е и човек.
Затоа што, како на друг начин, би можел да биде роден Бог од жена, Кој предвечно постои, а да не станал човек?“ (Св. Јован Дамаскин).
Давајќи Ѝ на Пресветата име Богородица, истовремено ја исповедаме и Тајната за Христос, која се извршува на Божествената Литургија.
Достојно е навистина Блажена, Тебе да Те нарекуваме, Богородице! 
Затоа што, како на друг начин, би можел да биде роден Бог од жена, Кој предвечно постои, а да не станал човек?“ (Св. Јован Дамаскин).
