ЗА БЛАЖЕНСТВАТА …
Блажени се бедните по дух, зашто нивно е царството небесно!
- Во светот постојат многумина бедни по дух, но не како што треба.
Блажени се оние што плачат, оти ќе се утешат!
- Има и многумина што плачат, но, заради тоа што го загубиле имотот или што ги загубиле своите деца…
Блажени се кротките, зашто тие ќе ја наследат земјата!
- Има и многумина кротки, но не спрема нечистите страсти .
Блажени се гладните и жедните за правда, оти тие ќе се наситат!
- Има и гладни и жедни, но тие се гладни и жедни да го ограбуваат туѓото и да ги собираат материјалните блага.
Блажени се милостивите, зашто тие ќе бидат помилувани!
- Има и многу милостиви, но кон телото и телесното.
Блажени се чистите по срце, оти тие ќе Го видат Бога!
- Има и чисти по срце, но според суетноста.
Блажени се миротворците, зашто тие ќе се наречат синови Божји!
- И миротворци има, но тие му ја потчинуваат душата на телото.
Блажени се гонетите заради правда, бидејќи нивно е царството небесно!
- Има и многу гонети и прогонувани, но заради своите лоши дела.
Блажени сте вие, кога ќе ве срамат и прогонат и кога ќе говорат против вас секакви лоши зборови лажно – заради Мене!
- Има и многу гонети и прогонувани, но заради своите лоши дела; многумина се прогонувани , но заради своите срамни гревови.
А блажени се оние, кои и дејствуваат и страдаат за Христа и во Христа!
Зошто?
– „ Зашто нивно е Царството небесно“ (Матеј 5, 3 и 10) и така натаму.
Тие не се блажени затоа што така дејствуваат и што страдаат, туку затоа што дејствуваат заради Христа и во Христа.
Свети Максим Исповедник
Подготви Мина Даниловска
—
