Царството Небесно не е јадење и пиење, туку праведност и мир и радост во Светиот Дух
+++
На христијанинот му е неопходно да пости за да го избистри својот ум, да стане почувствителен и својата волја да ја придвижи кон добро дело.
Овие човечки способности ние ги помрачуваме и ги задушуваме најмногу со прејадување, опивање и грижите на овој свет, а со тоа отпаѓаме од Изворот на животот, Бог, и паѓаме во пропадливост и суета, изопачувајќи и осквернувајќи го ликот Божји во себе.
Прејадувањето и сладострастието нѐ приковуваат за земјата и ги поткаструваат крилјата на нашата душа. А погледнете, колку високо летаа сите испосници и подвижници Христови – како орли на небесата!
Тие, иако земнородни, живееја со умот и со срцето на небесата, слушајќи таму неискажливи зборови, и научувајќи се на Божествената премудрост.
А колку само човекот се понижува себеси со стомакоугодување, прејадување и опивање!
Тој ја изопачува својата природа, создадена според образ Божји и се вподобува на бесловесните животни, дури станува и полош од нив…
Христијанинот треба да пости и заради тоа што со воплотувањето на Синот Божји човечката природа е обожена и заради тоа што ние итаме кон горното Царство кое не е јадење и пиење, туку праведност и мир и радост во Светиот Дух…
Само на незнабожците им е својствено прекумерно да јадат и пијат, препуштајќи им се на сетилните уживања…
Во онаа мера во којашто човекот ѝ удоволува на својата сетилност тој станува телесен и Го оддалечеува од себе Пресветиот Дух Божји, Кој не може да престојува во оние што водат исклучиво телесен живот:
бидејќи каква заедница постои помеѓу светлината и темнината?!
Таквите луѓе немаат вера ни љубов во срцето, ниту го имаат духот на молитвата. И ја одбегнуваат заедницата со Црквата.
Ако многу јадеш и пиеш ќе бидеш тело.
Ако постиш и се молиш ќе бидеш дух.
Не му верувај на телото свое, кое за време на молитвата ти се заканува дека нема да можеш да издржиш – те лаже.
Кога ќе почнеш да се молиш, ќе видиш дека тоа ќе стане твојот покорен слуга. Молитвата ќе го ободри.
Секогаш сеќавај се дека телото е лажливо.
Свети Јован Кронштатски
