ЗА ЉУБОВТА
…Љубовта се познава преку Светиот Дух. А душата Го препознава во мирот и во сладоста.
О, колку сме должни ние да Му благодариме на Бог за тоа што многу нè љуби.
Размислете, возљубени браќа: Господ ѝ го дава Светиот Дух на грешната душа, и ѝ дава да ја познае Неговата милост.
За да Го познаеме Бог не ни треба богатство. Треба само да го љубиме ближниот и да го имаме смирениот дух, воздржание и послушание, и за тие добри дела Господ ќе ни даде да Го познаеме.
А што може да биде на светот поскапоцено од тоа познание? Да се знае Бог, и колку Он нè љуби и на кој начин духовно нè воспитува?
Каде ќе најдеш таков татко што би умрел на крстот заради престапите на своите деца?
Обично на таткото му е тешко и го сожалува синот што треба да биде казнет заради своите престапи. Но, дури и ако го сожалува синот, сепак ќе му рече:
„Ти постапи лошо, и за своите лоши дела праведно си казнет”.
Господ пак, никогаш нема да ни каже такво нешто. Он и нам ќе ни каже како на Апостолот Петар:
„ Ме љубиш ли?”
Така и во рајот ќе ги праша сите:
„Дали ме љубите?”
И сите ќе одговорат:
„Да, Господи, ние Те љубиме.
Ти нè спаси со Своите страдања на крстот, а сега ни го подари и Небесното Царство”.
И никој на небото нема да се срами така како што се срамеа Адам и Ева по падот. Но, ќе има само кротост, љубов и смирение.
Не смирение онакво какво што го гледаме сега, кога се смируваме себеси, и трпиме кога нè укоруваат, или се сметаме за полоши од сите.
Туку сите ќе го имаат Христовото смирение, коешто е недостижно за луѓето, освен за оние што го познаа преку Светиот Дух.“
(Од преданието на св. отци)
